អំពី STINL

មន្ទីរពិសោធន៍ជាតិ វិទ្យាសាស្ត្រ បច្ចេកវិទ្យា និងនវានុវត្តន៍ (ម.ជ.វ.ប.ន.) ត្រូវបានបង្កើតឡើងក្នុងឆ្នាំ ១៩៩២ មានឈ្មោះដើម ជាការិយាល័យស្រាវជ្រាវ នៃនាយកដ្ឋានបច្ចេកទេសឧស្សាហកម្ម នៃក្រសួង ឧស្សាហកម្ម រ៉ែ និងថាមពល។ ព្រឹត្តិបត្រដ៏គួរឱ្យកត់សម្គាល់នៃពង្រីកវិសាលភាពការិយាល័យស្រាវជ្រាវមួយនេះ តាមរយៈប្រកាសលេខ ៣៧៧ ឧរថ.ឌិតស.ប្រក នៅថ្ងៃទី១ ខែមិថុនា ឆ្នាំ២០០៥ បានប្រកាសឈ្មោះជា  «មជ្ឈមណ្ឌលមន្ទីរពិសោធន៍ឧស្សាហកម្មកម្ពុជា (ម.ម.ឧ.ក)»  ដែលមានកេរ្តិ៍ឈ្មោះក្នុងការផ្តល់សេវាមន្ទីរពិសោធន៍ដែលមានគុណភាពខ្ពស់ ក្នុងការគាំទ្រដល់វិស័យឧស្សាហកម្ម និងវិទ្យាសាស្ត្រនៅក្នុងប្រទេសកម្ពុជា។ តាមរយៈអនុក្រឹត្យលេខ ៤៨ អនក្រ.បក ចុះថ្ងៃទី ៦ ខែមេសា ឆ្នាំ ២០២០ ម.ម.ឧ.ក ត្រូវបានប្តូរឈ្មោះទៅជា ម.ជ.វ.ប.ន. ដែលស្របតាមចក្ខុវិស័យរបស់រាជរដ្ឋាភិបាលកម្ពុជាក្នុងការពង្រឹងសមត្ថភាពវិស័យវិទ្យាសាស្ត្រ និងបច្ចេកវិទ្យារបស់ខ្លួន។ ម.ជ.វ.ប.ន. រក្សាបាននូវស្តង់ដារខ្ពស់បំផុតនៅក្នុងសេវាកម្មរបស់ខ្លួន ដោយរក្សាបានការវាយតម្លៃទទួលស្គាល់ស្តង់ដារសម្រាប់មន្ទីរពិសោធន៍ ISO/IEC 17025:2017 ដែលធានាបាននូវស្តង់ដារការធ្វើតេស្តវិភាគ ប្រកបដោយទំនុកចិត្ត និងការទទួលស្គាល់ជាអន្តរជាតិ។

ការផ្លាស់ប្តូរដ៏សំខាន់មួយបានបង្កើតឡើងនៅថ្ងៃទី២០ ខែមិថុនា ឆ្នាំ២០២៤  រាជរដ្ឋាភិបាលកម្ពុជាបានប្រែក្លាយ ម.ជ.វ.ប.ន. ទៅជាគ្រឹះស្ថានសាធារណៈរដ្ឋបាល (PAI) តាមរយៈអនុក្រឹត្យលេខ១៤១ អនក្រ.បក ដោយផ្តល់ឱ្យនូវការបង្កើនស្វ័យភាព និងភាពបត់បែននៃប្រតិបត្តិការការងារ។ ការផ្លាស់ប្តូរនេះអនុញ្ញាតឱ្យ ម.ជ.វ.ប.ន. ពង្រីកវិសាលភាពសេវាកម្មរបស់ខ្លួន និងរួមចំណែកកាន់តែមានប្រសិទ្ធភាពចំពោះវឌ្ឍនភាពឧស្សាហកម្ម និងវិទ្យាសាស្ត្ររបស់ប្រទេសកម្ពុជា ទន្ទឹមនឹងនោះដែរ ម.ជ.វ.ប.ន. រក្សាការប្តេជ្ញាចិត្តដែលមិនប្រួលប្រែរបស់ខ្លួនចំពោះឧត្តមភាពក្នុងការផ្តល់សេវាកម្មមន្ទីរពិសោធន៍។

ម.ជ.វ.ប.ន. ត្រូវបានទទួលបានអនុលោមភាពលើស្តង់ដារមន្ទីរពិសោធន៍ពីស្ថាប័ន Singapore Accreditation Council’s Singapore Laboratory Accreditation Scheme (SAC-SINGLAS) ប្រទេសសិង្ហបុរី សម្រាប់ការធ្វើតេស្តវិភាគផ្នែកគីមីសាស្រ្ត (SAC-SINGLAS) និងដោយ National Association of Testing Authorities (NATA) នៃប្រទេសអូស្ត្រាលី សម្រាប់ការធ្វើតេស្តវិភាគផ្នែកមីក្រូជីវសាស្រ្ត។ ម.ជ.វ.ប.ន. ដំណើរការដោយអនុលោមពេញលេញតាមស្តង់ដារ ISO/IEC 17025:2017 ដោយផ្តល់នូវសេវាកម្មដែលបំពេញតាមស្តង់ដារអន្តរជាតិយ៉ាងម៉ត់ចត់។